​ខ្សែប្រយុទ្ធ Gareth Bale បាន​និយាយថា កីឡាករ​របស់​ក្រុមបាល់ទាត់​ជម្រើសជាតិ​វេ​លស៍ កំពុងតែ​ទទួលយក​នូវ​ការរំពឹងទុក​ផ្សេងៗ​ជុំវិញ​ពួកគេ ខណៈដែល​ពួកគេ​សម្លឹង​រក​ការ​ឈ្នះ​កៅអី​ឈានទៅ​ប្រកួត​ក្នុង​យុទ្ធនាការ​ដ៏​សំខាន់​មួយ​ជា​លើកដំបូង​ក្នុង​រយៈពេល​៥៧​ឆ្នាំ​។

​ក្រុម​ជម្រើសជាតិ​វេ​លស៍ នឹងត្រូវ​ជួប​ជាមួយនឹង​ក្រុម​ជម្រើសជាតិ​បូ​ស្នី ក្នុង​ទីក្រុង Zenica នៅ​ថ្ងៃ​សៅរ៍​នេះ ដោយ​ត្រូវការ​ត្រឹមតែ​១​ពិន្ទុ​ប៉ុណ្ណោះ ដើម្បី​ឈ្នះ​កៅអី​ឈានទៅ ប្រកួត​ក្នុង​ព្រឹត្តិការណ៍ Euro ឆ្នាំ​២០១៦ នៅ​ប្រទេស​បារាំង ក្រោយពី​មិនបាន​ឈានទៅ​ប្រកួត​ក្នុង​យុទ្ធនាការ​ដ៏​ធំ​មួយ​សោះ​បើ​គិត ចាប់តាំងពី World Cup ឆ្នាំ​១៩៥៨​។​

​បន្ទាប់មក ពួកគេ​នឹង​បញ្ចប់​យុទ្ធនាការ​ជម្រុះ​របស់​ពួកគេ​តាមរយៈ​ការធ្វើជា​ម្ចាស់ផ្ទះ ទទួលភ្ញៀវ​អង់​ដូ​រ៉ា ដែល​មានន័យថា ពួកគេ​មានប្រៀប​ដ៏​ពិ​សេសមួយ ហើយ Bale បាន​និយាយថា ក្រុម​ជម្រើសជាតិ​វេ​លស៍ កំពុង​ទទួលបន្ទុក​នូវ​ការរំពឹងទុក​ផ្សេងៗ​ទៅលើ​ការ​ឈ្នះ​កៅអី​ទៅ​ជុំ ផ្តាច់ព្រ័ត្រ​។

​ខ្សែប្រយុទ្ធ​របស់​ក្លិប Real Madrid រូបនេះ ដែល​ប្រទេស​របស់គេ​មិន​ធ្លាប់​លេង​ក្នុង​យុទ្ធនាការ​អឺរ៉ុប​ជុំ​ផ្តាច់ព្រ័ត្រ​សោះ​នោះ បាន​ឲ្យ​ដឹងថា​៖ «​យើង​កំពុងតែ​ស្ថិត​យ៉ាង​ប្រកៀក​ក្នុងការ​សម្រេចបាន​នូវ​អ្វីមួយ​ដែល គ្មាន​ក្រុម​ផ្សេងទៀត​មិនបាន​ធ្វើ​ពីមុនមក ហើយ​យើង​ពិតជា​រំភើប​ណាស់​»​។​

Bale បាន​ប្រាប់​បន្ថែមទៀតថា​៖ «​នេះ​ជា​សម្ពាធ​ដ៏​ល្អ​បំផុត​ក្នុងការ​មាន ហើយ​យើង​ចង់ទុក​សម្ពាធ​នោះ​។ យើង​ដឹងថា យើង​មានការ​ប្រថុយប្រថាន ប៉ុន្តែ យើង​កំពុង​រក្សា​ធ្វើ​ឲ្យ​អារម្មណ៍​ស្ងប់ ហើយ​យើង​ដឹង​ពីអ្វី​ដែល​យើង​ត្រូវតែ​ធ្វើ​»​។ ការប្រកួត​នៅ​ថ្ងៃ​សៅរ៍​នេះ នឹង​ចាប់ផ្តើម​នៅ​ម៉ោង​១:៤៥​ទៀបភ្លឺ​៕

​ការជួបគ្នា​បី​លើកចុងក្រោយ​រវាង​ក្រុម​ទាំងពីរ​
11.10.14          Wales 0-0 Bosnia & Herzegovina
16.08.12          Wales 0-2 Bosnia & Herzegovina
13.02.03          Wales 2-2 Bosnia & Herzegovina

​ប្រភព​៖ cambosport